《想唔想知呢一萬蚊點嚟》
今朝老豆佢發訊息俾我話政府派一萬蚊，我完全感受到佢有幾開心同高興，因為呢個時勢，呢一萬蚊真係幫到唔少。
回想起當年政府派6000蚊時，係2011年，我剛剛畢業幾年做緊野，當時屋企環境仲唔錯，呢六千蚊真係可以當係買花戴，認真講，係開心既。
時移世易，十年時光我收到呢一萬蚊，反而有另一番體會……
呢650億，每人分到一萬，有冇諗過呢650億可以做到咩？如果十年前政府用呢筆錢去做以下既事，今日香港又會係咩景況？
如果用呢筆錢去改善醫療制度的話，或者今日有好多人唔需要再為病痛去煩惱而困苦；
如果用呢筆錢去加大房屋供應的話，或者今日有好多人唔需要為供樓而痛不欲生；
如果用呢筆錢去調整行業結構的話，或者今日有好多人唔會因為自由行停止而失去生計。
我唔太鐘意去比較，因為我覺得人比人真係比死人，但講派錢睇睇澳門，人地係開心錢，多左出黎洗，而政府呢筆係應急錢，真係去到山窮水盡佢先派。
再思考一下點解今日會山窮水盡？假如政府有能力去回應市民訴求，假如政府有能力去調解矛盾，假如政府面對疫情能早日封關，假如政府有能力去比到一個將來，比到一個希望，比到一個願景大家的話，今日又何須派錢呢？
我相信香港人唔係乞衣，我地寧願有個公平同健康既環境去自食其力，都唔希望受政府派錢呢種行為幫助，而係我眼睇，派錢，只係一個唔能夠防患未然，事後又毫無能力去改變既政府所提出既無腦政策。
今日或者大家都會因為派錢而暗爽一下，係，我都覺得係好過無，但或者你細味上面提到既事，再思考一下呢一萬蚊其實來得係有血有淚，我地放棄左太多太多機會同改變，積落黎既陰質錢。
Search